Молитва о преодолении экуменической ереси и уврачевании ран нашей земной Церкви

Предлагается читать по соглашению каждый день до «Всеправославного собора» и во время его проведения в 22. 00

Боже Вечный, у Тебе же несть пременение, истину Твою непременну нам даровавый! Молим Тя, Церковь Твою во истине сохрани, да пребудет невреждена от ересей и расколов, от лжеучений пагубных и наветов диавольских, от безбожия наглаго и зловерия, от примирения ложнаго со духом пагубным века сего, наипаче же от грехов наших.

Исцели пастыри некия и люди мирския от ереси пагубныя экуменизма глаголемаго, иже речет ложно церквам быти и христианом вне ограды Церкве Православныя. Сия есть Церковь Едина, идеже Ты пребываеши, несть бо Церкве вне ограды ея, и несть тамо спасения. Вера же православная едина истинна есть, без неяже достигнути не возмогут сыны человечестии и дщери человеческия царствия Христова. Сие царствие Небесное даруй нам, Господи, по вере нашей, по делом любве, наипаче же по милости Твоей и благодати.

Вразуми иерархи и пастыри, мирских ради соблазнов от учения евангельскаго, апостольскаго и отеческаго отступающыя, со еретики молящыяся и собрания их яко равныя Церкви Твоей лестно именующыя. Даруй им покаяние искреннее и на пути правды Твоея возврати их.

Соверши, Господи, суд Твой над пастыри ложными и волки тайными, яже в ересь экуменизма глаголемаго, во грех содомский, в соблазн сребролюбия и властолюбия впадоша, и сими Церковь разделити и святость ея сквернити потщишася. Очисти, Господи, Церковь Православную от грехов сих, от соблазнов и лжеучений. Нам же даруй крепость Твою, да стоим верно во Истине Твоей, и никтоже от нас да почитает неразумно послушание архиереем и пастырем превышшим быти Тебе, Богу нашему, послушания святаго.

Утверди, Господи, соборность в Церкви Твоей, яже от человек упраздняема бывает, но Тобою воставляется. Веру праву невреждену в нас и непорочну соблюди, по велицей Твоей милости. Разори востания еретическая, тайная же и явная. Уврачуй раны Церкви Твоея. Водительствуй ею неотступно, и да будет о всех воля Твоя, ныне, и присно, и во веки веков. Аминь.